بەرەی تورکمانی رایگەیاند کۆبوونەوەکەی ئەنجوومەنی پارێزگای کەرکووک کە لە بەغدا کرا، “پێچەوانەی یاسایە”، دەشڵێ “سکاڵا لەسەر پێشێلکارییە یاساییەکانی کۆبوونەوەکە تۆمار دەکەین.”
لە کۆنگرەیەکی رۆژنامەڤانیدا ئەمڕۆ (یەکشەممە، 11-8-2024) بەرەی تورکمانی رایگەیاند “کێشەی کەرکووک بە دابەشکردنی پلە و پۆست چارەسەر نابێت… ئەوەی روویداوە دژی سازان و پێکهاتن و تەبایی نێوان پێکهاتەکانە.”
کۆبوونەوەکەی شەوی رابردووی ئەنجوومەنی پارێزگای کەرکووک لە بەغدا، بە بێ بەشداریی تورکمان کرا، کە دوو کورسییان لە ئەنجوومەنەکە هەیە، بەرەی تورکمانی دەڵێ “کەس ناتوانێت تورکمان فەرامۆش بکات… نە بەشداریمان کرد و کەسیش نوێنەرایەتی ئێمەی نەکردووە.”
بەرەی تورکمانی جەختیش دەکاتەوە لەوەی “پێشێلکردنی یاسایی لە کۆبوونەوەکەی بەغدا هەیە؛ تورکمان لە کۆبوونەوەکەی بەغدا ئامادەنەبوو و ئەوەش پێچەوانەی یاسایە.”