كەمێك پێش ئێستە لیستی مووچەی فەرمانبەرانی هەرێمی كوردستان رادەستی وەزارەتی دارایی عێراق كرا و وردبینی دەستی پێ كردووە و ئەگەری هەیە سبەی تەواو بێت.
ئەمڕۆ دووشەم 22ـی نیسان، سەرچاوەیەك لە ئەنجوومەنی وەزیرانی عێراق، راگەیاند، لیستی مووچەی فەرمانبەران رادەستی وەزارەتی دارایی عێراق كرا و ئەمڕۆش وردبینی تێدا دەكرێت.
زیاتر گوتی، وردبینییەكە هێندە كاتی ناوێت، رەنگە بەیانی تەواو بكرێت و دەست بكرێت بە تەمویلی مووچەی فەرمانبەران.
دوێنێ وەزارەتی دارایی و ئابووری حكوومەتی هەرێمی كوردستان بڵاوی كردەوە، لیستی مووچەی مانگی نیسانی فەرمانبەران و مووچەخۆرانی هەرێم ڕەوانەی بەغدا كرا.
باس لەوەش كرا، لیستی مووچەی مانگی نیسانی سەرجەم فەرمانبەران و مووچەخۆرانی هەرێمی كوردستان ڕەوانەی وەزارەتی دارایی حكوومەتی فیدراڵی كرا، بڕیارە دوای وردبینیكردنی لیستەكان تەمویلی مووچەی سەرجەم وەزارەت و دامەزراوەكانی هەرێمی كوردستان ڕەوانە بكرێت.