سەرۆكایەتی شارەوانی هەولێر چەند پڕۆژەیەكی نوێ بۆ شەڵتەری ئاژەڵە بێلانەكان لە هەولێر جێبەجێ دەكات كە بۆ پاراستنی سەگە بێلانەكانە لەناو شەڵتەرەكەدا.
شارەوانی هەولێر بڵاوی كردەوە: لەسەر بودجەی پارێزگای هەولێر و بە گوژمەی نزیکەی 55 ملیۆن دینار، پرۆژەی پەرەپێدانی شەڵتەر لەژێر جێبەجێکردن دایە.
بڵاویشی كردەوە: برگەکانی پڕۆژەكە پێک دێت لە شەقامێکی قیر بەدرێژیی (400) مەتر و 3 مەتر پان، لەگەڵ دروستکردنی 400 خانووی کۆلیت و دروستکردنی 6 کەپری 6 بە 6 بۆ سێبەر.
هەروەها بڵاوی كردەوە: هەر لەنێو شەڵتەرەكەدا 5 حەوزی ئاو بۆ فێنکردنەوەی ئاژەڵەکان لە وەرزی گەرما دروست دەكرێ، لەگەڵ کۆنکریتکردنی گۆرەپانێک بۆ دانانی خواردن بۆ ئاژەڵەکان و پاراستنی ژینگەی ناو شەڵتەرەکە.
لە ناوەڕاستی ساڵی رابردوو شەڵتەری ئاژەڵە بێلانەكان لە شاری هەولێر كرایەوە كە تێیدا سەگە بێ لانەكانی نێو كووچە و كۆڵانەكانی شاری تێدا كۆكرایەوە كە ببوونە هۆكاری مەترسی بۆ سەر هاووڵاتییان و دیمەنێكی ناشارستانی بە پایتەخت بەخشی بوو، لە قۆناغی سەرەتاشدا سەرووی دوو هەزار سەگی تێدا كۆكرایەوە.