پۆلیسی راپەڕین تۆمەتبارێكی گەنجی دەستگیركرد كە هەڵسابوو بە شكاندنی سندووقی خێرخوازی لە مزگەوتێكی چوارقوڕنە و دزینی پارەكانی ناوی.
پۆلیسی راپەڕین بڵاوی كردەوە: دوای ئەوەی هێزەڪانمان ئاگاداركرانەوە لە دزینی بڕێك پارە لە ناو سندوقی خێرخوازی لە مزگەوتی چوارقوڕنە، ڕێكاری پێویست گیرایەبەر.
دوای بەدواداچوونی وورد و بە سوودوەرگرتن لە تۆماری كامێراكانی چاودێری، توانرا لە ماوەیەکی کەمدا تۆمەتبارێك بە ناوی (ک. ب. ر) لە ڕەگەزی نێر لە دایكبووی ساڵی 2008 دەستگیر بکرێت.
تۆمەتبارەكە دانی نا بە تاوانەكەی كە هەستاوە بە دزینی بڕی 498 هەزار و 500 دینار عێراقی لە ناو سندووقی خێرخوازی مزگەوتەكەدا.
ئێستا تۆمەتبارەكە بە بڕیاری دادوەر و بە پێی ماددەی (444) لە یاسای سزادانی عێڕاقی دەستگیركراوە.