بڕیارێك لەبارەی خەرجكردنی دەرماڵەی مامۆستایانی زانكۆ و پەیمانگەكان دەدرێت.

بڕیارێك بۆ دەرماڵەی ھاندانی بەشێكی مامۆستایانی زانکۆ و پەیمانگاكانی هەرێمی كوردستان دەردەكرێت و بەرپرسێكیش روونكردنەوەی لەبارەوە دەدات.

بەپێی نووسراوێكی وەزارەتی خوێندنی باڵا و توێژینەوەی زانستیی هەرێمی كوردستان، كە لە 4ی8ی2024، دەرچووە و كۆپییەكی دەست (باسنیوز) كەوتووە، فەرمانگەكان و زانكۆكان لەبارەی خەرجنەكردنی دەرماڵەی دوو مانگ ئاگادار دەكاتەوە.

ئاماژە بەوە كراوە: “بەپێی نووسراوی وەزارەتی دارایی، دەرماڵەی ھاندان بۆ مامۆستایانی دەرەوەی سەنتەری پارێزگاکانی سلێمانی و ھەولێر و دھۆک لە مانگی 7 و 8 خەرج ناكرێت.”

وەزارەتی دارایی بە نووسراوێك لە 11ی7ی2024، كە بۆ وەزارەتی خوێندنی باڵای ناردووە، جەختی كردووەتەوە، ئەو دەرماڵەیە لە مانگی 7 و 8 راگیراوە و خەرج ناکرێت.

دەرماڵەی هاندان بۆ هەڵگرانی بڕوانامەی ماستەر و دکتۆرا لەدەرەوەی سەنتەری شارەکانی هەولێر، دهۆک و سلێمانی لەسەر میلاکی کۆلێژ و پەیمانگاکان، بە بڕی 200 هەزار دیناری مانگانە بۆ مامۆستایانی خاوەن بڕوانامەی ماستەر و بڕی 300 هەزار دیناری مانگانە بۆ مامۆستایانی خاوەن بڕوانامەی دکتۆرا خەرج دەكرێت.

توانا نەجەف، بەڕێوەبەری گشتیی کارگێڕی و دارایی لە وەزارەتی خوێندنی باڵا و توێژینەوەی زانستی  ڕاگەیاند: “بەپێی بڕیارێكی ئەنجوومەنی وەزیران و وەزارەتی دارایی لە پشووی هاوین لە هەردوو مانگی 7 و 8دا دەرماڵەكە بە هۆكاری قەیرانی دارایی خەرج ناكرێت، بەڵام لە 10 مانگەكەی دیكەی ساڵدا بۆیان خەرج دەكرێت.”