سەرۆک بارزانی لە کاتی کۆبوونەوە لەگەڵ سەرکردە سوننەکان لە بەغدا ڕایگەیاند، بارودۆخێکی سیاسیی نوێ لە عێراق هاتووەتە ئاراوە و ئەمەش دەرفەتی تێپەڕاندنی بەربەستەکان زیاتر دەکات.
سەرۆک بارزانی لە چوارچێوەی کۆبوونەوەکانی لە بەغدا، لە ماڵی خەمیس خەنجەر بە ئامادەبوونی محەممەد حەلبووسی، سەرۆکی پارتی تەقەدووم لەگەڵ سەرکردەکانی سوننە کۆبووەوە و چەندین پرسی ناوخۆیی و ناوچەکەیان تاوتوێ کرد.
هاوپەیمانیی سیادە کە خەمیس خەنجەر سەرکردایەتیی دەکات ڕایگەیاند، “هەردوولا چەندین مەلەفیان تاوتوێ کرد وەکو؛ میکانیزمەکانی هەڵبژاردنی سەرۆکی پەرلەمانی عێراق، بوونی هێزەکانی هاوپەیمانان، مەلەفی نەوت و بودجە و بارودۆخی سیاسی.
سەرۆک بارزانی ئاماژەی بەوە داوە بارودۆخێکی سیاسیی نوێ و کرانەوەیەکی ڕوون بۆ چارەسەری کێشەکان هاتووەتە ئاراوە و ئەمەش دەرفەتی تێپەڕاندنی بەربەستەکان زیاتر دەکات.
خەمیس خەنجەر دووپاتی کردووەتەوە هەرێمی کوردستان جەمسەرێکی سیاسیی سەرەکییە لە پرۆسەی سیاسی لە عێراقدا، هەوڵەکانی سەرۆک بارزانیش بۆ نزیکردنەوەی گۆشەنیگاکان و هەوڵدان بۆ یەکخستنی تێڕوانینەکان بۆ گەیشتن بە سەقامگیریی سیاسی و ئەمنی بەرز دەنرخێنێت.