کۆبوونەوەی سێقۆڵی بۆ هەناردەکردنەوەی نەوتی هەرێم ئەنجام دەدرێت
ئەندامێکی لیژنەی نەوت و گاز لە پەرلەمانی عێراق دەڵێت: رێککەوتنی هەولێر و بەغدا لەبارەی هەناردەکردنەوەی نەوت دەکەوێتە بواری جێبەجێکردنەوە.
وتەبێژی ئەپیکور دەڵێت: هەموو لایەنەکان خەریکی ئامادەکارین بۆ کۆبوونەوەی سێقۆڵی.
یەحیا ئەحمەد فەرەج عیساوی، ئەندامی لیژنەی نەوت و گاز لە پەرلەمانی عێراق، رایگەیاند، حکومەتی فیدراڵی و حکومەتی هەرێمی کوردستان رێککەوتوون لەسەر هەناردەکردنەوەی نەوت لە رێگەی بەندەری جەیهان.
دەشڵێت “پێشبینی دەکەم رێککەوتنەکە بکەوێتە بواری جێبەجێکردنەوە؛ چونکە رێککەوتن لەگەڵ حکومەتی تورکیاش کراوە و تەنیا جێبەجێکردنی ماوە.”
ئاماژەی بەوەشکرد “تەنیا بابەتی تەکنیکیی نۆژەنکردنەوەی بۆرییەکە ماوە. ئەگەر هەر کەموکورتییەکی تەکنیکیش هەبێ، چارەسەر دەکرێت.”
راشیگەیاند، ئەم هەفتەیە لە بەغدا کۆبوونەوەی نێوان وەزارەتی نەوت، وەزارەتی سامانە سروشتییەکان و کۆمپانیاکانی نەوت دەکرێ. کۆبوونەوەکە بۆ لابردنی بەربەستەکانی بەردەم پرۆسەی هەناردەکردنەوەی نەوتە.